കൊച്ചി: കോഴിക്കോട് റവന്യു ജില്ലാ കലോത്സവത്തില് ഒന്നാം സ്ഥാനം നേടിയ കിത്താബ് എന്ന വിവാദ നാടകം സംസ്ഥാന സ്കൂള് യുവജനോത്സവത്തില് അവതരിപ്പിക്കാന് അനുവദിക്കണമെന്നാവശ്യപ്പെട്ടുള്ള ഹര്ജി ഹൈക്കോടതി തീര്പ്പാക്കി. മേമുണ്ട ഹയര് സെക്കന്ഡറി സ്കൂളിലെ വിദ്യാര്ഥികള് അവതരിപ്പിച്ച കിത്താബ് എന്ന നാടകം റവന്യു ജില്ലാ കലോത്സവത്തില് എ ഗ്രേഡും ഒന്നാം സ്ഥാനവും നേടിയിരുന്നു.
നാടകത്തിന്റെ ഉള്ളടക്കം സ്കൂള് മാനേജ്മെന്റ് പരിശോധിച്ച് ഉറപ്പു വരുത്തിയശേഷമാണ് അവതരണത്തിന് അനുമതി നല്കിയത്. എന്നാല് നാടകത്തിനെതിരെ ഒരു വിഭാഗം എതിര്പ്പുമായി വന്നതോടെ സ്കൂള് ഹെഡ്മാസ്റ്റര് നാടകം സംസ്ഥാന സ്കൂള് യുവജനോത്സവത്തില് അവതരിപ്പിക്കുന്നതിന് അനുമതി നല്കിയില്ല. ഇതിനെതിരെയാണ് നാടകാവതരണത്തില് പങ്കെടുത്ത കുട്ടികള് ഹൈക്കോടതിയെ സമീപിച്ചത്.
കിത്താബ് എന്ന നാടകത്തിനെതിരെ അനാവശ്യമായ വിവാദമാണ് ഉയരുന്നതെന്നും നാടകം അവതരിപ്പിക്കാന് അനുവദിക്കണമെന്നുമായിരുന്നു ഹര്ജിക്കാരുടെ ആവശ്യം. ഒന്നാം സ്ഥാനം നേടിയ നാടകത്തിന് അനുമതി നിഷേധിച്ച ഹെഡ്മാസ്റ്ററുടെ തീരുമാനവും രണ്ടാം സ്ഥാനം കിട്ടിയ നാടകം സംസ്ഥാന സ്കൂള് യുവജനോത്സവത്തില് അവതരിപ്പിക്കാന് അനുമതി നല്കിയ കോഴിക്കോട് ഡിഡിഇയുടെ തീരുമാനവും സ്വേച്ഛാപരമാണെന്നാണ് ഹര്ജിയിലെ വാദം.
എന്നാല് ഈ നാടകം അവതരിപ്പിക്കേണ്ടെന്ന് തീരുമാനിച്ചതായി സ്കൂള് മാനേജ്മെന്റ് അറിയിച്ചതിനെ തുടര്ന്നാണ് തുടര്നടപടികള് സ്വീകരിച്ചതെന്നു സര്ക്കാര് വ്യക്തമാക്കി. ഈ സാഹചര്യത്തില് നാടക അവതരണാനുമതിക്കായി സര്ക്കാരിന് അപ്പീല് നല്കാമെന്ന് വ്യക്തമാക്കിയ സിംഗിള്ബെഞ്ച് ഹര്ജി തീര്പ്പാക്കി.
പ്രതികരിക്കാൻ ഇവിടെ എഴുതുക: