തൃശൂര്: അവകാശത്തെച്ചൊല്ലി തര്ക്കം നടന്നുകൊണ്ടിരിക്കുന്ന തൃശ്ശൂര് മാന്നാമംഗലം സെന്റ് മേരീസ് പള്ളിയില് ഓര്ത്തഡോക്സ് യാക്കോബായ വിഭാഗങ്ങള് തമ്മില് ഏറ്റുമുട്ടി. സംഘര്ഷത്തില് ഓര്ത്തഡോക്സ് തൃശ്ശൂര് ഭദ്രാസനാധിപന് യൂഹന്നാന് മാര് മിലിത്തിയൂസ് ഉള്പ്പെടെ നിരവധി പേര്ക്ക് പരിക്കേറ്റു.
രാത്രി 12 മണിയോടെ ഓര്ത്തഡോക്സ് വിഭാഗം ഗേറ്റ് തകര്ത്ത് പള്ളിയിലേക്ക് കടക്കാന് ശ്രമിച്ചതോടെയാണ് സംഘര്ഷമുണ്ടായത്. ഇരു വിഭാഗങ്ങള് തമ്മില് കല്ലേറ് ആരംഭിച്ചതോടെ പ്രതിഷേധക്കാരെ പോലീസ് അറസ്റ്റ് ചെയ്ത് നീക്കി. പരിക്കേറ്റവരെ കുന്നംകുളത്തെ വിവിധ ആശുപത്രികളില് പ്രവേശിപ്പിച്ചിരിക്കുകയാണ്. സമരപ്പന്തല് പോലീസ് പൂര്ണ്ണമായും ഒഴിപ്പിച്ചു.
മുപ്പതോളം ഓര്ത്തഡോക്സ് വിഭാഗക്കാരെ അറസ്റ്റ് ചെയ്തിട്ടുണ്ട്. പള്ളിയില് നിന്ന് പുറത്തിറങ്ങുന്ന യാക്കോബായ വിഭാത്തിലുള്ളവരെയും അറസ്റ്റ് ചെയ്ത് നീക്കി. 120 പേര്ക്കെതിരെയാണ് ഇതുവരെ കേസെടുത്തത്. ജാമ്യമില്ലാ വകുപ്പ് പ്രകാരമാണ് ഇവര്ക്കെതിരെ കേസെടുത്തിരിക്കുന്നത്. വധശ്രമം, കലാപ ശ്രമം എന്നീ വകുപ്പുകളാണ് ചുമത്തിയിരിക്കുന്നത്. നിരവധി വൈദികരും കേസില് ഉള്പ്പെട്ടിട്ടുണ്ട്.
പാത്രിയാര്ക്കിസ് വിഭാഗത്തിന് കീഴിലുള്ള പള്ളിയില് ആരാധന നടത്താന് അനുവദിക്കണമെന്നാവശ്യപ്പെട്ടാണ് ഓര്ത്തഡോക്സ് വിഭാഗം സമരം ചെയ്തത്. തങ്ങള്ക്കനുകൂലമായ കോടതി വിധി ചൂണ്ടിക്കാട്ടിയായിരുന്നു സമരം.എന്നാല് ഓര്ത്തഡോക്സ് വിഭാഗത്തെ പള്ളിയില് കയറാന് അനുവദിക്കാതെ യാക്കോബായ വിഭാഗവും പള്ളിയ്ക്കകത്ത് നിലയുറപ്പിക്കുകയായിരുന്നു. സമരപ്പന്തല് ഒഴിപ്പിച്ചെങ്കിലും സംഘര്ഷ സാധ്യത കണക്കിലെടുത്ത് സ്ഥലത്ത് പോലീസ് ക്യാമ്പ് ചെയ്യുന്നുണ്ട്.
പ്രതികരിക്കാൻ ഇവിടെ എഴുതുക: