ബാഴ്സലോണ: ബാഴ്സയെ അവരുടെ തട്ടകത്തില് സമനിലയില് തളച്ച് റയല് മാഡ്രിഡ് കോപ്പ ഡെല് റെ ഫുട്ബോള് ചാമ്പ്യന്ഷിപ്പിന്റെ സെമിഫൈനലില് പിടിമുറുക്കി. ന്യൂ കാമ്പിലെ ആദ്യപാദസെമിയില് ഇരു ടീമുകളും ഓരോ ഗോള് നേടി സമനിലയില് പിരിയുകയായിരുന്നു.
ബാഴ്സയെ ഞെട്ടിച്ച് ആറാം മിനിറ്റില് തന്നെ റയല് മുന്നിലെത്തി. കരീം ബെന്സേമയുടെ ക്രോസ് പിടിച്ചെടുത്ത് വാസ്ക്വസ് തൊടുത്തുവിട്ട ഷോട്ട് ബാഴ്സയുടെ വലയില് കയറിനിന്നു. ആദ്യ പകുതിയില് റയല് 1-0 ന് മുന്നിട്ടുനിന്നു.
രണ്ടാം പകുതിയില് ബാഴ്സ ഗോള് മടക്കി. മാല്ക്കമാണ് സ്കോര് ചെയ്തത്. ലൂയി സുവാരസ് ഗോള് മുഖത്തേക്ക് നീട്ടിയ പന്ത് സെര്ജിയോ രാമോസ് അടിച്ചകറ്റി. പക്ഷെ പന്ത് പിടിച്ചെടുത്ത മാല്ക്കം റയലിന്റെ പോസ്റ്റിലേക്ക് അടിച്ചുകയറ്റി 1-1.
തുടര്ന്ന് വിജയം നേടാനായി ബാഴ്സ മെസിയേയും റയല് ഗാരേത്ത് ബെയ്ലിനെയും കളത്തിലിറക്കി. റയലിന് വിജയം സമ്മാനിക്കാന് ബെയ്ലിന് അവസരം കൈവന്നെങ്കിലും അത് മുതലാക്കാനായില്ല. മെസിക്കും ഒന്ന് രണ്ട് അവസരങ്ങള്ക്ക് ലഭിച്ചു. പക്ഷെ അതൊന്നും ഗോളാക്കിമാറ്റാനായില്ല.
ബാഴ്സലോണയും റയല് മാഡ്രിഡും തമ്മിലുള്ള രണ്ടാം പാദ സെമിഫൈനല് ഈ മാസം 27 ന് സാന്റിയാഗോ ബര്ണാബേയില് നടക്കും.
പ്രതികരിക്കാൻ ഇവിടെ എഴുതുക: