തിരുവനന്തപുരം: തനിക്കെതിരെ അപകീര്ത്തികരമായ പരാമര്ശം നടത്തിയെന്നാരോപിച്ച് സംസ്ഥാന ഖാദി ബോര്ഡിനെതിരെ 50 കോടി രൂപ നഷ്ടപരിഹാരം ആവശ്യപ്പെട്ടു നടന് മോഹന്ലാല് വക്കീല് നോട്ടീസയച്ചു. മോഹന്ലാല് സ്വകാര്യ വസ്ത്രവ്യാപാര സ്ഥാപനത്തിന്റെ പരസ്യത്തില് അഭിനയിച്ചതോടെയാണ് വിവാദങ്ങളുടെ തുടക്കമായത്.
സ്വകാര്യ സ്ഥാപനത്തിന്റെ ഉല്പ്പന്നത്തിനു ഖാദിയുമായി ബന്ധമില്ലെന്നും ചര്ക്കയില് നൂല്നൂല്ക്കുന്നതായി മോഹന്ലാല് അഭിനയിക്കുന്നതു ഖാദിബോര്ഡിനു നഷ്ടവും സ്വകാര്യസ്ഥാപനത്തിനു ലാഭവും ഉണ്ടാക്കുമെന്നും വിലയിരുത്തിയാണു പരസ്യം പിന്വലിക്കണമെന്നാവശ്യപ്പെട്ട് ഖാദി ബോര്ഡ് വക്കീല് നോട്ടിസ് അയച്ചിരുന്നു. ഇതിനു മറുപടിയായാണ് ഖാദി ബോര്ഡിന് മോഹന്ലാല് നോട്ടീസ് അയച്ചത്.
തനിക്കെതിരെ അപകീര്ത്തികരമായ പരാമര്ശം നടത്തിയതിന് ഖാദിബോര്ഡ് പരസ്യമായി മാപ്പുപറയുകയോ ക്ഷമാപണം നടത്തി മാധ്യമങ്ങളില് പരസ്യം നല്കുകയോ ചെയ്തില്ലെങ്കില് 50 കോടി രൂപ നല്കണമെന്നാണു ലാല് ആവശ്യപ്പെട്ടിരിക്കുന്നതെന്ന് ഖാദിബോര്ഡ് വൈസ് ചെയര്മാന് ശോഭന ജോര്ജ് പറഞ്ഞു. കഴിഞ്ഞമാസമാണ് മോഹന്ലാലിന്റെ വക്കീല് നോട്ടിസ് ഖാദിബോര്ഡിന് ലഭിച്ചത്. വിവാദമായതോടെ സ്വകാര്യ സ്ഥാപനം പരസ്യം പിന്വലിച്ചു.
പ്രതികരിക്കാൻ ഇവിടെ എഴുതുക: