ചങ്ങനാശേരി: എൻഎസ്എസിനെ ചെറുതാക്കി കാണാൻ കോടിയേരി ബാലകൃഷ്ണൻ ശ്രമിക്കേണ്ടെന്നും സമയംപോലെ പറ്റിക്കൂടിനിന്ന് എന്തെങ്കിലും നേടുന്ന സംസ്കാരമല്ല എൻഎസ്എസിന് ഉള്ളതെന്നും ജനറൽ സെക്രട്ടറി ജി. സുകുമാരൻ നായർ. എൻഎസ്എസ് പ്രവർത്തകരിൽ ഭൂരിഭാഗവും ഇടതിനൊപ്പമെന്ന കോടിയേരിയുടെ പ്രസ്താവനയ്ക്കുള്ള മറുപടിയിലാണ് അദ്ദേഹം ഇക്കാര്യം വ്യക്തമാക്കിയത്.
എൻഎസ്എസ് നേതൃത്വം പറഞ്ഞാൽ നായന്മാരാരും കേൾക്കില്ലെന്നും എല്ലാവരും ഞങ്ങളോടൊപ്പമാണെന്ന് മുമ്പ് പറഞ്ഞവരുടെ അവസ്ഥ ഇന്ന് എന്താണെന്ന് കോടിയേരി ഓർക്കുന്നത് നന്നായിരിക്കും. എസ്എൻഡിപി നേതൃത്വത്തെ പരോക്ഷമായി സൂചിപ്പിച്ച് സുകുമാരൻ നായർ പറഞ്ഞു. എൻഎസ്എസ്സിൽ എല്ലാ രാഷ്ട്രീയപ്പാർട്ടികളിലും പെടുന്നവരുണ്ട്.
രാഷ്ട്രീയത്തിന് അതീതമായവരും ഉണ്ട്. അവരിൽ ബഹുഭൂരിപക്ഷം തങ്ങളോടൊപ്പമാണ് ഉള്ളതെന്ന കോടിയേരിയുടെ പ്രസ്താവന നിരർത്ഥകമാണ്. എൻഎസ്എസ് നേതൃത്വത്തിന് സർക്കാരിനോട് വിപ്രതിപത്തി ഉണ്ടെന്നുള്ള കാര്യം പല തവണ വ്യക്തമാക്കിയിട്ടുള്ളതാണ്.
അത് സ്വാർത്ഥപരമല്ല, വിശ്വാസസംരക്ഷണത്തിന്റെ പേരിൽ മാത്രമാണ്. അക്കാര്യത്തിൽ ശത്രുപക്ഷത്താണ് എൻഎസ്എസ്സിനെ കാണുന്നതെങ്കിൽ അതിനെ വിശ്വാസികളോടൊപ്പം സമാധാനപരമായി നേരിടുകതന്നെ ചെയ്യുമെന്നും സുകുമാരൻ നായർ വ്യക്തമാക്കി.
പ്രതികരിക്കാൻ ഇവിടെ എഴുതുക: