കാസര്കോട്: കാസര്കോട് പെരിയയിലെ ഇരട്ട കൊലപാതകങ്ങള് രാഷ്ട്രീയ കൊലപാതകങ്ങള് ആണെന്നും പിന്നില് സിപിഎം പ്രവര്ത്തകര് എന്ന് പ്രഥമാന്വേഷണ റിപ്പോര്ട്ട്. സിപിഎം പ്രാദേശിക നേതാവിനെ ആക്രമിച്ചതില് ഉള്ള പ്രതികാരമാണ് കൊലപാതകത്തിന് കാരണം. ലോക്കല് കമ്മിറ്റി അംഗത്തെ ആക്രമിച്ച കേസില് ശരത്ലാല് ഒന്നാം പ്രതിയും കൃപേഷ് ആറാം പ്രതിയും ആയിരുന്നു. ഇരുവര്ക്കും നേരത്തേ ഭീഷണിയുണ്ടായിരുന്നുവെന്നും എഫ്ഐആറില് പറയുന്നു.
ആയുധപരിശീലനം ലഭിച്ചവരോ മുമ്പ് ഇത്തരം കുറ്റകൃത്യങ്ങളില് ഏര്പ്പെട്ടിട്ടുള്ളവരോ ആണ് കൊലപാതകം നടത്തിയതെന്നാണ് പോലീസിന്റെ നിഗമനം. കൊടുവാള് പോലെയുള്ള മൂര്ച്ചയുള്ള ആയുധം ഉപയോഗിച്ച് ഉണ്ടാക്കിയ മുറിവുകളാണ് ഇരുവരുടേയും മരണകാരണം എന്നാണ് റിപ്പോര്ട്ട്. ശരത് ലാലിന് കഴുത്തിന്റെ വലതുവശത്ത് ആഴത്തിലുള്ള വെട്ടേറ്റിട്ടുണ്ട്. ഇരുകാലുകളിലുമായി അഞ്ച് വെട്ടുകളും ശരത്ലാലിന് ഏറ്റിട്ടുണ്ട്. അസ്ഥിയും മാംസവും തമ്മില് കൂടിക്കലര്ന്ന രീതിയില് മാരകമായ മുറിവുകളാണ് കാലുകളിലുള്ളത്.
കൃപേഷിന്റെ നെറ്റിയുടെ തൊട്ടുമുകളില് മൂര്ദ്ധാവില് ആഴത്തിലുള്ള ഒറ്റ വെട്ടാണ് ഏറ്റിരിക്കുന്നത്. 11 സെന്റീമീറ്റര് നീളത്തിലും രണ്ട് സെന്റീമീറ്റര് ആഴത്തിലുമുള്ള വെട്ടേറ്റ് തലയോട് തകര്ന്ന് സംഭവസ്ഥലത്തുതന്നെ കൃപേഷ് മരിച്ചു. ആശുപത്രിയിലേക്ക് കൊണ്ടുപോരുന്നതിനിടെയാണ് ശരത്ലാല് മരിച്ചത്.
പ്രതികരിക്കാൻ ഇവിടെ എഴുതുക: