ന്യൂദല്ഹി : കോടികളുടെ ബാങ്ക് തട്ടിപ്പ് നടത്തി രാജ്യം വിട്ട വജ്രവ്യാപാരി നീരവ് മോദിയെ ഉടന് അറസ്റ്റ് ചെയ്യാന് യുകെയോടും, ഇന്റര്പോളിനോടും സിബിഐ ആവശ്യപ്പെടും. പഞ്ചാബ് നാഷണല് ബാങ്കില് നിന്ന് കോടികളുടെ വായ്പാ തട്ടിപ്പ് നടത്തി ഒളിച്ചുകടന്ന നീരവ് ലണ്ടനില് ഉള്ളതായി കഴിഞ്ഞ ദിവസം റിപ്പോര്ട്ടുകള് പുറത്തുവന്നിരുന്നു. നീരവ് മോദിക്കെതിരെ നേരത്തെ ഇന്റര്പോള് റെഡ് കോര്ണര് നോട്ടീസ് പുറപ്പെടുവിച്ചിട്ടുണ്ട്. ഈ നോട്ടീസിന്റെ അടിസ്ഥാനത്തില് നീരവിനെതിരായ നടപടികള് ഉടന് കൈക്കൊള്ളാനാണ് യുകെ അധികൃതരോടും ഇന്റര്പോളിനോടും സിബിഐ ആവശ്യപ്പെടുക.
അതേസമയം വ്യാജരേഖ ചമച്ച് മറ്റു രാജ്യങ്ങളിലേക്ക് നീരവ് കടക്കാനുള്ള സാധ്യതയുള്ളതിനാല് അത്തരമൊരു അവസരം ഉണ്ടാകാതിരിക്കാന് ശ്രമിക്കണമെന്നും ഇന്റര്പോളിനോടും യുകെ അധികൃരോടും സിബിഐ ആവശ്യപ്പെടും. ലണ്ടനിലേക്ക് ഒളിച്ചു കടന്ന നീരവ് ബിനാമി പേരില് ഇപ്പോഴും വജ്ര വ്യാപാരം തുടരുന്നുണ്ടെന്നാണ് മാധ്യമങ്ങള് കഴിഞ്ഞ ദിവസം റിപ്പോര്ട്ട് ചെയ്തത്.
ലണ്ടന് വെസ്റ്റ് എന്ഡിലെ ആഢംബര കെട്ടിട സമുച്ചയമായ സെന്റര് പോയിന്റ് ടവറിലാണ് നീരവ് മോദിയുടെ താമസം. ഇതിന്റെ വാടക ഒരു മാസം ഏകദേശം 15 ലക്ഷം രൂപ വരുമെന്നുമുള്ള വിവരങ്ങളും കഴിഞ്ഞ ദിവസം പുറത്തു വന്നിരുന്നു. അതേസമയം നീരവിനെ തിരിച്ചു കൊണ്ടുവരുന്നത് സംബന്ധിച്ച് യുകെയോട് ആവശ്യപ്പെട്ടിട്ടുണ്ടെന്ന് കേന്ദ്ര സര്ക്കാരും കഴിഞ്ഞ ദിവസം അറിയിച്ചിരുന്നു.
പ്രതികരിക്കാൻ ഇവിടെ എഴുതുക: