നൗകാമ്പ്: യുവേഫ ചാമ്പ്യന്സ് ലീഗില് ക്വാര്ട്ടര് ലക്ഷ്യമിട്ട് ബാഴ്സ ഇന്ന് ഇറങ്ങും. ഫ്രഞ്ച് ക്ലബ് ലിയോണാണ് എതിരാളികള്. മറ്റൊരു മത്സരത്തില് മ്യൂണിക്കിലെ അലയന്സ് അരീനയില് ബയേണ് മ്യൂണിക്ക് ലിവര്പൂളിനെയും നേരിടും.
ഈ ടീമുകളുടെ ആദ്യ പാദ മത്സരം ഗോള്രഹിത സമനിലയില് കലാശിച്ചിരുന്നു. ഇന്ന് സ്വന്തം തട്ടകത്തിലെ മത്സരത്തില് വിജയിച്ച് ക്വാര്ട്ടര് ഉറപ്പാക്കാനുള്ള തയ്യാറെടുപ്പിലാണ് ബാഴ്സയും ബയേണും.
ലിയോണില് നടന്ന ആദ്യ പാദത്തില് ബാഴ്സക്കെതിരെ അപ്രതീക്ഷിത പ്രകടനം പുറത്തെടുത്താണ് ഫ്രഞ്ച് ക്ലബ് സമനില നേടിയത്. അത്തരമൊരു പ്രകടനം നടത്താനുറച്ചാണ് ലിയോണ് നൗകാമ്പിലെത്തിയിട്ടുള്ളത്. എന്നാല് നൗ കാമ്പിലെ സ്വന്തം ആരാധകര്ക്ക് മുന്നില് ബാഴ്സക്കെതിരെ ലിയോണ് താരങ്ങള്ക്ക് എത്രത്തോളം പിടിച്ചുനില്ക്കാനാവുമെന്നാണ് ഇന്ന് കണ്ടറിയാനുള്ളത്. ബാഴ്സ നിരയില് ഡെംബെലെ, വെര്മാലന് എന്നിവര് കളിക്കാന് സാധ്യതയില്ല. പരിക്കുമൂലം റഫീഞ്ഞോയും കളിക്കാനിറങ്ങില്ല. എങ്കിലും മെസ്സി, സുവാരസ്, കുടീഞ്ഞോ ത്രയം ഇറങ്ങുമ്പോള് ലിയോണ് പ്രതിരോധം വെള്ളംകുടിക്കുമെന്ന് ഉറപ്പ്.
2008-09 സീസണില് ഇരു ടീമുകളും ഏറ്റുമുട്ടിയപ്പോള് ഇരുപാദങ്ങളിലുമായി 6-3ന്റെ വിജയവും ബാഴ്സക്കായിരുന്നു. എട്ടാം തവണയാണ് ഇരു ടീമുകളും ഏറ്റുമുട്ടിനിറങ്ങുന്നത്. മുന്പ് കളിച്ച 7-ല് നാലില് ബാഴ്സ ജയിച്ചപ്പോള് മൂന്നെണ്ണം സമനിലയില് കലാശിച്ചു.
തുടര്ച്ചയായ എട്ടാം ക്വാര്ട്ടര് ഫൈനല് ലക്ഷ്യമിട്ടാണ് സ്വന്തം മൈതാനത്ത് ബയേണ് മ്യൂണിക്ക് ഇറങ്ങുന്നത്. എതിരാളികള് നിലവിലെ റണ്ണറപ്പുകളായ ലിവര്പൂള്. എന്നാല് മികച്ച താരങ്ങളുടെ അഭാവം ബയേണിനെ കുഴക്കുന്നുണ്ട്. മുള്ളര്, കിമ്മിച്ച് എന്നിവര് സസ്പെന്ഷന് കാരണം കളിക്കാനിറങ്ങില്ല. വെറ്ററന് സ്ട്രൈക്കര് ആര്യന് റോബന്, ടോലിസ് എന്നിവര് പരിക്കിന്റെ പിടിയില്. എങ്കിലും റോബര്ട്ടോ ലെവന്ഡോവ്സ്കി, ഫ്രാങ്ക് റിബറി, ഹാമിഷ് റോഡ്രിഗസ്, തിയാഗോ എന്നിവരുടെ കാലുകളില് പ്രതീക്ഷയര്പ്പിച്ചാണ് ബയേണ് കൡക്കാനിറങ്ങുന്നത്.
മറുവശത്ത് ലിവര്പൂളും മികച്ച പ്രതീക്ഷയിലാണ്. പ്രീമിയര് ലീഗിലെ മികച്ച പ്രകടനം പുറത്തെടുത്ത് ബയേണിനെ കീഴടക്കി അവസാന എട്ടില് ഇടംപിടിക്കാമെന്ന പ്രതീക്ഷയിലാണ് ലിവര്പൂള്. സാദിയോ മാനെ, ഫിര്മിനോ, മുഹമ്മദ് സല തുടങ്ങിയ സൂപ്പര് താരങ്ങളിലാണ് ലിവര്പൂളിന്റെ പ്രതീക്ഷ. ഓക്സ്ലാഡ് ചേംബര്ലെയ്ന്, ഗോമസ് എന്നിവര് പരിക്കുമൂലം ഇന്ന് കളിക്കാനിറങ്ങില്ല. മുന്പ് കളിച്ച ആറ് കളികളില് ഇരുടീമുകളും ഓരോ വിജയം നേടിയപ്പോള് നാലെണ്ണം സമനിലയില് പിരിഞ്ഞു.
പ്രതികരിക്കാൻ ഇവിടെ എഴുതുക: