തൃശൂര്: നെന്മാറയിലെ കര്ഷകരുടെ പരാതികള്ക്കും ആവശ്യങ്ങള്ക്കും ദുരിതം നിറഞ്ഞ കഥകള്ക്കും ക്ഷമയോടെ കാതോര്ത്ത് ആലത്തൂര് മണ്ഡലം എന്ഡിഎ സ്ഥാനാര്ത്ഥി ടി.വി. ബാബു. സ്ഥാനാര്ത്ഥി പര്യടനത്തിന്റെ മൂന്നാം ദിവസം ടി.വി. ബാബുവിന്റെ മുന്നിലെത്തിയ വോട്ടര്മാരില് ഭൂരിഭാഗം പേര്ക്കും പറയാനുണ്ടായിരുന്നത് കാലങ്ങളായി അനുഭവിച്ചു കൊണ്ടിരിക്കുന്ന അവഗണനയുടേയും വഞ്ചനകളുടേയും കഥകള് മാത്രം.
പറമ്പിക്കുളം ആളിയാര് പദ്ധതി നടപ്പാക്കുന്നതിലെ അപാകതകളെ കുറിച്ചാണ് പലരും പരാതി പെട്ടത്. കര്ഷകരെ തമ്മില് പ്രാദേശികമായി ഭിന്നിപ്പിക്കുന്ന തരത്തിലാണ് ജലവിതരണം നടത്തുന്നത് എന്നാണ് പ്രധാന പരാതി. 30 വര്ഷത്തിലൊരിക്കല് പുതുക്കേണ്ട പദ്ധതിയുടെ കരാര് 60 വര്ഷമായിട്ടും പുതുക്കിയിട്ടില്ലെന്നും കര്ഷകര് പറഞ്ഞു.
മേഖലയിലെ വന്യമൃഗ ശല്യം മൂലമുണ്ടാവുന്ന കൃഷിനാശത്തിനും ആശങ്കകള്ക്കും പരിഹാരം കാണാന് അധികൃര്ക്ക് കഴിയുന്നില്ല. പ്രളയശേഷം നടത്തേണ്ട പുനരധിവാസ നടപടികളില് പോലും നിലവിലെ എം.പി.യുടെ അസാന്നിധ്യത്തെ വോട്ടര്മാര് വിമര്ശിച്ചു.
എല്ലാവരുടേയും പുറത്തുതട്ടി ആശ്വസിപ്പിച്ച് കൊണ്ട് സ്വതസിദ്ധമായ ചെറു പുഞ്ചിരിയോടെ ടി.വി. ബാബുവിന് പറയാനുണ്ടായിരുന്നത് ഇത്രമാത്രം. ഒരു കര്ഷക കുടുംബത്തില് ജനിച്ചുവളര്ന്ന് ഇന്നും കര്ഷകനായി ജീവിക്കുന്ന എനിക്ക് നിങ്ങളുടെ വിഷമങ്ങള് മനസ്സിലാക്കാനാവും. ഒരു സ്ഥാനാര്ത്ഥി എന്ന നിലയിലല്ല, ഒരു സഹോദരനെന്ന നിലയിലാണ് ഞാനിപ്പോള് നിങ്ങള്ക്ക് മുന്നില് നില്ക്കുന്നത്. നിങ്ങളുടെ പ്രശ്നങ്ങള്ക്ക് എന്നാലാവുന്ന തരത്തില് പരിഹാരമുണ്ടാക്കാന് ഞാന് ശ്രമിക്കും. ബാബുവിന്റെ വാക്കുകള് നിറഞ്ഞ മനസ്സോടെ സ്വീകരിച്ച ജനങ്ങള് സര്വ്വ പിന്തുണയും വാഗ്ദാനം ചെയ്താണ് അദ്ദേഹത്തെ യാത്രയാക്കിയത്.
രാവിലെ എട്ടിന് നെന്മാറ നിയമസഭാ മണ്ഡലത്തില് അയിലൂര് പഞ്ചായത്തിലെ തലവെട്ടാംപാറയില് നിന്നാണ് ഇന്നലത്തെ പ്രചരണം ആരംഭിച്ചത്. അയിലൂര് പഞ്ചായത്തിലെ കയറാണി, ഒലിപ്പാറ, നെന്മാറ പഞ്ചായത്തിലെ നെന്മാറ ടൗണ്, ചാത്തേമംഗലം, വടവല്ലൂര് പഞ്ചായത്തിലെ കാക്കരക്കുളം, വടവല്ലൂര് ടൗണ്, ചെറാക്കോട്, ഒഴിവുപ്പാറ, പല്ലാവൂര്, കൊടുവായൂര് ടൗണ്, പുതുനഗരം പഞ്ചായത്തിലെ അടിച്ചിറ, കരിന്തോട് കൊല്ലങ്കോട് പഞ്ചായത്തിലെ കൊല്ലങ്കോട് ടൗണ്, ചിക്കനാംപാറ തുടങ്ങി വിവിധ പഞ്ചായത്തുകളിലെ പ്രധാനകേന്ദ്രങ്ങളില് പര്യടനം നടത്തി. വൈകീട്ട് ഏഴിന് മുതലമട പഞ്ചായത്തിലെ മാഞ്ചിറയില് പര്യടനം അവസാനിച്ചു.
ബിജെപി നെന്മാറ നിയോജകമണ്ഡലം പ്രസിഡന്റ് കെ. വേണു, സംസ്ഥാന സമിതിയംഗം സി. പ്രഭാകരന്, പാലക്കാട് ജില്ലാ സമിതിയംഗം എന്. ബാബു, ബിഡിജെഎസ് മണ്ഡലം പ്രസിഡന്റ് ആര്. അരവിന്ദാക്ഷന്, മണ്ഡലം ജനറല് സെക്രട്ടറി എസ്. ദിവാകരന്, ഒബിസി മോര്ച്ച പാലക്കാട് ജില്ലാ ജനറല് സെക്രട്ടറി സി. അംബുജാക്ഷന് എന്നിവര് സ്ഥാനാര്ത്ഥിയെ അനുഗമിച്ചു.
പ്രതികരിക്കാൻ ഇവിടെ എഴുതുക: