അമ്പലപ്പുഴ: ഐതിഹ്യ പെരുമയുടെ ഓര്മ പുതുക്കി പ്രസിദ്ധമായ അമ്പലപ്പുഴ നാടകശാല സദ്യ ഇന്ന്. ശ്രീകൃഷ്ണസ്വാമി ക്ഷേത്രത്തിലെ ഒമ്പതാം ഉത്സവദിവസമായ ഇന്ന് ഉച്ചയ്ക്ക് 12.30നാണ് സദ്യ. ഭഗവല് സാന്നിദ്ധ്യം ഉണ്ടന്ന് ഭക്തര് വിശ്വസിക്കുന്ന നാടകശാല സദ്യ ക്ഷേത്രം ഉപദേശക സമിതിയുടെ നേതൃത്വത്തിലാണ് നടക്കുന്നത്.
ഐതിഹ്യം ഇങ്ങനെ: ക്ഷേത്ര ദര്ശനത്തിന് എത്തിയ വില്വമംഗലം സ്വാമിയാര് ശ്രീകോവിലില് ഭഗവാനെ കാണാതെ മണിക്കിണറിനു തെക്കുഭാഗത്തുള്ള നാടകശാലയില് ക്ഷേത്രം ജീവനക്കാര് സദ്യ കഴിക്കുന്നിടത്തേയ്ക്കു ചെന്നു. ബ്രാഹ്മണക്കുട്ടിയുടെ വേഷത്തില് നെയ്യ് വിളമ്പുന്ന ഭഗവാനെക്കണ്ട് ആനന്ദചിത്തനായി കണ്ണാ എന്നു വിളിച്ചു. ഇതു കേട്ട് ഭഗവാന് പുറത്തേയ്ക്ക് ഓടി മറഞ്ഞു. സ്വാമിയാരും, ക്ഷേത്രം ജീവനക്കാരും പിന്നാലെ ഓടി. ഈ ഐതിഹ്യത്തിന്റെ ഓര്മ പുതുക്കലാണ് നാടകശാല സദ്യ.
സദ്യയില് പങ്കെടുക്കാനും, ചടങ്ങ് കാണാനും ആയിരക്കണക്കിനു ഭക്തരെത്തും. വിഭവ സമൃദ്ധമായ സദ്യയാണ് ഒരുക്കുന്നത്. ഊണ് പൂര്ത്തിയാകുന്നതിന് മുന്പ് പരസ്പരം ചോറ് വാരിയെറിഞ്ഞ് വഞ്ചിപ്പാട്ടിന്റെ ഈരടികളുമായി ക്ഷേത്രത്തിനു പടിഞ്ഞാറു ഭാഗത്തുള്ള പുത്തന്കുളത്തില് പോയി മുങ്ങി മടങ്ങി വരും. ദേവസ്വം അധികൃതരും, പോലീസും പഴക്കുലയും,പണക്കിഴിയുമായി ഇവരെ സ്വീകരിക്കുന്നതോടെ ചടങ്ങുകള് സമാപിക്കും. സദ്യയില് പങ്കെടുക്കാന് സാധിക്കാത്തവര്ക്കായി പ്രസാദം ഊട്ടും നടക്കും.
പ്രതികരിക്കാൻ ഇവിടെ എഴുതുക: