തിരുവനന്തപുരം: രാഹുല് രാഷ്ട്രീയ അഭയാര്ഥിയായാണ് കേരളത്തില് എത്തിയിരിക്കുന്നതെന്ന് ബിജെപി സംസ്ഥാന അധ്യക്ഷന് അഡ്വ. പി.എസ്. ശ്രീധരന്പിള്ള. ലീഗിനെ ആശ്രയിച്ച് മത്സരിക്കുന്നത് പരാജയമാണെന്നും തിരുവനന്തപുരം പ്രസ് ക്ലബ്ബിന്റെ ‘ജനായത്തം’ പരിപാടിയില് പങ്കെടുത്ത് അദ്ദേഹം പറഞ്ഞു.
രാഹുല് വയനാട് മത്സരിക്കുന്നതിനെക്കുറിച്ച്?
അമേഠി ഉള്പ്പെടെ ഉത്തരേന്ത്യയില് എല്ലായിടത്തും പരാജയപ്പെടുമെന്ന് ഭയമുള്ളതിനാലാണ് രാഹുല് വയനാട്ടില് മത്സരിക്കാനെത്തിയത്. ജവഹര്ലാല് നെഹ്റു ചത്തകുതിരയെന്ന് വിശേഷിപ്പിച്ച മുസ്ലിംലീഗിനെ ആശ്രയിച്ച് അവരുടെ സ്വാധീന മണ്ഡലത്തില് കോണ്ഗ്രസ്സിന്റെ ദേശീയ അധ്യക്ഷന് മത്സരിക്കേണ്ടി വരുന്നത് അപചയവും പരാജയത്തിന് തുല്യവുമാണ്.
മുസ്ലിംലീഗ്, മുസ്ലിം സമുദായ രാഷ്ട്രീയ സംഘടനയാണോ?
തീര്ച്ചയായും. അറുപത് ശതമാനത്തോളം ന്യൂനപക്ഷ വോട്ടുള്ള മണ്ഡലമാണ് വയനാട്. ഇവിടെ കോണ്ഗ്രസ്സിനേക്കാള് മുസ്ലിംലീഗിനാണ് സ്വാധീനം. ഇതല്ലാതെ മറ്റെന്ത് പ്രത്യേകതയാണ് വയനാട് തെരഞ്ഞെടുക്കാന് കാരണമായിട്ടുള്ളത്. ഈ സാഹചര്യം രാജ്യത്തെ ജനങ്ങളോട് പറയേണ്ട രാഷ്ട്രീയ ഉത്തരവാദിത്വം ബിജെപിക്കുള്ളതിനാലാണ് നരേന്ദ്ര മോദിയും അമിത് ഷായും വിഷയം ഉന്നയിച്ചത്. അത് മുസ്ലിംവിരുദ്ധമാണെന്ന് വ്യാഖ്യാനിക്കേണ്ടതില്ല.
രാഹുലിനായുള്ള വയനാട് സീറ്റ് യെച്ചൂരി നിര്ദേശിച്ചതാണോ?
അങ്ങനെയാണ് എനിക്ക് കിട്ടിയ വിവരം. രാഹുലിന് ഉത്തരേന്ത്യയില് ജയിക്കാന് കഴിയില്ല. രാഹുല് രാഷ്ട്രീയ അഭയാര്ഥിയായാണ് കേരളത്തില് എത്തിയിരിക്കുന്നത്.
ദേശീയ രാഷ്ട്രീയം കണക്കിലെടുക്കുമ്പോള് രാഹുലിനെതിരെ മത്സരിക്കേണ്ടത് ബിജെപി ആയിരുന്നില്ലേ?
എന്ഡിഎയാണ് കേരളത്തിലെ ഇരുപത് സീറ്റിലും മത്സരിക്കുന്നത്. ബിജെപി എന്ഡിഎ സ്ഥാനാര്ഥികളായാണ് 20 മണ്ഡലങ്ങളിലും മത്സരിക്കുന്നത്. അതുകൊണ്ട് അതിനെ വേര്തിരിക്കേണ്ട ആവശ്യമില്ല.
ശബരിമല പ്രധാന വിഷയമാക്കുന്നതില് നിന്ന് ബിജെപി പിന്നോട്ട് പോകുന്നുണ്ടോ?
ശബരിമല, രാജ്യസുരക്ഷ, കേന്ദ്ര സര്ക്കാരിന്റെ വികസന നേട്ടങ്ങളെല്ലാം പ്രധാന വിഷയങ്ങളാണ്. ഈ വിഷയങ്ങള് ഉചിതമായ രീതിയില് ജനങ്ങള്ക്ക് മുന്നില് അവതരിപ്പിക്കും.
ത്യശൂര് ബിജെപിക്ക് വിജയസാധ്യതയുള്ള മണ്ഡലമാണോ?
തീര്ച്ചയായും ബിജെപി ത്യശൂരില് വിജയിക്കും.
വയനാട് തുഷാറിന് അനുകൂലമായി കാണുന്ന ഘടകം?
ബിഡിജെഎസിന് നല്കിയ സീറ്റായതിനാലാണ് വയനാട് തുഷാര് മത്സരിക്കുന്നത്. ശക്തനും പൊതുസമ്മതുമായ സ്ഥാനാര്ഥിയാണ് തുഷാര്. സംശുദ്ധമായ രാഷട്രീയമാണ് അദ്ദേഹത്തിന്റേത്. വ്യക്തിപരമായി നല്ല ആളാണ് അദ്ദേഹം.
കേരളത്തില് അക്കൗണ്ട് തുറക്കുന്നതിനെക്കുറിച്ച്?
കഴിഞ്ഞ തെരഞ്ഞെടുപ്പില് ഏഴോളം മണ്ഡലങ്ങളില് എന്ഡിഎക്ക് രണ്ട് ലക്ഷത്തോളം വോട്ട് ലഭിച്ചിട്ടുണ്ട്. നിരവധി മണ്ഡലങ്ങളില് ഇത്തവണ ജയിക്കാന് സാധിക്കും.
രമ്യാ ഹരിദാസിനെതിരായ എ. വിജയരാഘവന്റെ പരമാര്ശത്തോടുള്ള അഭിപ്രായം?
വ്യക്തിനിഷ്ഠമായ കാര്യങ്ങളെക്കുറിച്ച് കൂടുതല് മനസ്സിലാക്കാതെ പ്രതികരിക്കുന്നത് ശരിയല്ല.
പ്രതികരിക്കാൻ ഇവിടെ എഴുതുക: