കോട്ടയം: ശബരിമല വിഷയം വോട്ടര്മാരെ സ്വാധീനിക്കുമെന്ന് എന്എസ്എസ് ജനറല് സെക്രട്ടറി ജി സുകുമാരന് നായര്. ശബരിമലയില് വിശ്വാസം സംരക്ഷിക്കണം എന്ന് തന്നെയാണ് നിലപാട്. അത് വിശ്വാസികള്ക്ക് അനുകൂലവുമാണ്. വിശ്വാസികള് എവിടെയൊക്കെയുണ്ടോ ,അവിടെയൊക്കെ ഈ പ്രതിഫലനം ഉണ്ടാകും .
ഈ നിലപാട് കുറച്ചെങ്കിലും തെരഞ്ഞെടുപ്പിനെ സ്വാധീനിക്കുമെന്നും ജി സുകുമാരന് നായര് പറഞ്ഞു. ജനങ്ങള് തികഞ്ഞ യാഥാര്ത്ഥ്യ ബോധത്തോടെയാണ് ഇത്തവണ തെരഞ്ഞെടുപ്പിനെ സമീപിക്കുന്നത്. തെരഞ്ഞെടുപ്പുകളില് നിന്ന് വ്യത്യസ്ഥമായി ഇത്തവണ ജനാധിപത്യ വിജയം ഉണ്ടാകും. ഒരു നിര്ദ്ദേശവും വോട്ടര്മാര്ക്ക് എന്എസ്എസ് നല്കിയിട്ടില്ല. എന്എസ്എസിന് സമദൂര നിലപാടാണെന്നും എന്എസ്എസ് ആസ്ഥാനത്തെത്തിയ എല്ലാ സ്ഥാനാര്ത്ഥികള്ക്കും വിജയാശംസ നേര്ന്നെന്നും ജി സുകുമാരന് നായര് പറഞ്ഞു.
ശബരിമല വിഷയത്തില് വിശ്വാസവും ,ആചാരവും സംരക്ഷിക്കാനുള്ള ബാദ്ധ്യത എല്ലാ പാര്ട്ടികള്ക്കും ഉണ്ട് .അതിനു ദോഷം ചെയ്യാന് ശ്രമിച്ചാല് ജനം പ്രതികരിക്കും, തീര്ച്ചയാണ്. സുപ്രീം കോടതി വിധി ഇത്രവേഗം നടപ്പാക്കാന് സര്ക്കാര് മുതിര്ന്നതെന്തിനാണ്. സര്ക്കാരിന് സാവകാശം ചോദിക്കാമായിരുന്നില്ലേ എന്നും എന്എസ്എസ് ജനറല് സെക്രട്ടറി ചോദിച്ചു. റിവ്യു ഹര്ജിയില് തീരുമാനം ആകും വരെ കാത്ത് കാത്ത് നിന്നിരുന്നെങ്കില് സര്ക്കാരിന് ഒരു ദോഷവും സംഭവിക്കില്ലായിരുന്നു എന്നും ജി സുകുമാരന് നായര് അഭിപ്രായപ്പെട്ടു.
ചങ്ങനാശ്ശേരി സെന്റ് തെരാസസ് സ്ക്കൂളിലാണ് അദ്ദേഹം വോട്ട് രേഖപ്പെടുത്തിയത്.
പ്രതികരിക്കാൻ ഇവിടെ എഴുതുക: