പേരാമ്പ്ര (കോഴിക്കോട്): ചെങ്ങോട്ടുമല കരിങ്കല് ഖനനത്തിന് ഡി ആന്ഡ് ഒ ലൈസന്സ് നല്കുന്നതിനെതിരെയുള്ള ഉപരോധ സമരത്തില് സമരക്കാരുടെ ആത്മഹത്യാഭീഷണി. പഞ്ചായത്ത് ഓഫീസ് ഉപരോധിച്ച ഖനനവിരുദ്ധ ആക്ഷന് കമ്മറ്റി പ്രവര്ത്തകരെ അറസ്റ്റു ചെയ്തു നീക്കാനുള്ള ശ്രമത്തിനിടെ നാല് സമരസമിതി പ്രവര്ത്തകര് മണ്ണെണ്ണയും തീപ്പെട്ടിയുമായി പഞ്ചായത്തോഫീസ് കെട്ടിടത്തിന്റെ മുകളില് കയറി. ഇതോടെ പൊലീസ് അറസ്റ്റിനുള്ള നീക്കം ഉപേക്ഷിച്ചു. ലിനീഷ് നരയംകുളം, പുവ്വലത്ത് മുരളി, ബിനീഷ് നരയംകുളം, ടി.പി. സുധീഷ് എന്നിവരാണ് ആത്മഹത്യാഭീഷണി മുഴക്കിയത്.
പ്രവര്ത്തകരെ ഇറക്കാന് ഫയര്ഫോഴ്സ് എത്തിയെങ്കിലും സമരക്കാര് അവരെ ഓഫീസിനു മുന്നിലേക്ക് കടത്തിവിട്ടില്ല. ജില്ലാ കളക്ടര് എത്താതെ താഴെയിറങ്ങില്ലെന്ന നിലപാടെടുത്തതോടെ പഞ്ചായത്ത് പ്രസിഡന്റ് കളക്ടറുമായി ഫോണില് സംസാരിച്ചു. ഇന്ന് കളക്ടറെത്തി സമരക്കാരുമായി ചര്ച്ച നടത്തുമെന്നുള്ള ഉറപ്പ് ലഭിച്ചതോടെ ഇവര് താഴെയിറങ്ങി.
പ്രതികരിക്കാൻ ഇവിടെ എഴുതുക: