തിരുവനന്തപുരം: വീടും വസ്തുവകകളും ജപ്തിയിലൂടെ നഷ്ടപ്പെടും എന്ന ആശങ്കയില് തീകൊളുത്തി ആത്മഹത്യക്ക് ശ്രമിച്ച നെയ്യാറ്റിന്കര മാരായമുട്ടം സ്വദേശം ലേഖ (40) മരിച്ചു. ലേഖയുടെ മകള് വൈഷ്ണവി (19) നേരത്തെ മരിച്ചിരുന്നു. ഇരുവരും ഒരുമിച്ചാണ് ആത്മഹത്യക്ക് ശ്രമിച്ചത്. തൊണ്ണൂറ് ശതമാനത്തിലേറെ പൊള്ളലേറ്റ ലേഖ അതീവ ഗുരുതരാവസ്ഥയില് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയില് കഴിയുകയായിരുന്നു. ലേഖയുടെ മൃതദേഹം പോസ്റ്റ്മോര്ട്ടത്തിന് ശേഷം നാളെ ബന്ധുക്കള്ക്ക് വിട്ടുകൊടുക്കും.
നെയ്യാറ്റിന്കര കാനറാ ബാങ്ക് ശാഖയില് നിന്ന് അഞ്ച് ലക്ഷം രൂപയാണ് പതിനഞ്ച് വര്ഷം മുന്പ് ഇവര് വായ്പ എടുത്തിരുന്നത്. പലിശ സഹിതം ഇതിപ്പോള് ആറ് ലക്ഷത്തി എണ്പതിനായിരം രൂപയായിട്ടുണ്ട്. ഇവരുടെ ഭര്ത്താവിന് വിദേശത്ത് ജോലിയുണ്ടായിരുന്നു. ആ ജോലി നഷ്ടപ്പെട്ടതോടെ സാമ്പത്തിക പ്രതിസന്ധിയിലായി. ജപ്തി നോട്ടീസ് ലഭിച്ചത് മുതല് അമ്മയും മകളും വലിയ മാനസിക പ്രയാസത്തിലായിരുന്നു്. ഭൂമി വിറ്റ് വായ്പ തിരിച്ചടക്കാന് ശ്രമിച്ചെങ്കിലും അതും പരാജയപ്പെട്ടതോടെയാണ് ആത്മഹത്യയ്ക്ക് പ്രേരിപ്പിച്ചതെന്നാണ് വിവരം.
സംഭവത്തില് കാനറ ബാങ്കിന്റെ നെയ്യാറ്റിന്കര മാരായമുട്ടം ബ്രാഞ്ച് മാനേജര്ക്കെതിരെ കേസെടുക്കാനാണ് പൊലീസ് തീരുമാനിച്ചിരിക്കുന്നത്.
ഒരു തരത്തിലും ജപ്തി നടപടികള്ക്ക് സമ്മര്ദ്ദം ചെലുത്തിയിട്ടില്ലെന്നാണ് ബാങ്ക് പറയുന്നത്. ഭവന വായ്പയാണ് കുടുംബം എടുത്തത്. തിരിച്ചടവ് മുടങ്ങിയതിനെത്തുടര്ന്ന് കോടതിയില് കേസ് കൊടുത്തിരുന്നു.
പ്രതികരിക്കാൻ ഇവിടെ എഴുതുക: