കേരളത്തില്‍ നെല്‍ക്കൃഷി കുറയുന്നു

Sunday 19 May 2019 9:48 am IST

കൊച്ചി: സംസ്ഥാനത്ത് നെല്‍കൃഷി ക്രമാതീതമായി കുറയുന്നു. പാടശേഖരങ്ങള്‍ വ്യാപകമായി നികത്തുന്നതും ഭീമമായ കൂലിയും കൃഷി ലാഭകരമല്ലാത്തതുമാണ് നെല്‍കൃഷിയെ ബാധിക്കുന്നത്. 1974- 75ല്‍ സംസ്ഥാനത്ത് 8.81 ലക്ഷം ഹെക്ടറിലായിരുന്നപ്പോള്‍ നെല്ലുല്‍പ്പാദനം 13.5 ലക്ഷം ടണ്ണായിരുന്നു. 2013ല്‍ ഇത്് 2,13,185 ഹെക്ടറായി ചുരുങ്ങിയപ്പോള്‍ നെല്ലുല്‍പാദനം 5.8 ലക്ഷം മെട്രിക് ടണ്ണായി. 

ഓരോ 10 വര്‍ഷത്തിലും രണ്ടുലക്ഷം ഹെക്ടര്‍ വീതം കൃഷി ഇല്ലാതാവുകയും ഉത്പാദനം പകുതിയിലധികം താഴുകയും ചെയ്തു. 2013- 14ല്‍ വിസ്തീര്‍ണം വീണ്ടുംകുറഞ്ഞ്് 1.99 ലക്ഷം ഹെക്ടറായി. മിക്ക ജില്ലകളിലും നെല്‍കൃഷി വ്യാപകമായി കുറയുകയാണ്. 1996- 97 മുതല്‍ 2012- 13 വരെയുള്ള കണക്ക് പ്രകാരം കൊല്ലം ജില്ലയിലാണ് ഏറ്റവും കുറവുണ്ടായിട്ടുള്ളത്(93 ശതമാനം). തൊട്ടുപിന്നില്‍ എറണാകുളം (92), തിരുവനന്തപുരം (86), മലപ്പുറം (78), ഇടുക്കി (43.5) കോട്ടയം (13). 

കേരളത്തിന്റെ നെല്ലറയെന്നറിയപ്പെടുന്ന പാലക്കാട് ജില്ലയില്‍ ഓരോ സീസണ്‍ കഴിയുംതോറും നെല്ലിന്റെ അളവും വിസ്തൃതിയും ആശങ്കാജനകമായ നിലയിലാണ് കുറയുന്നത്. ജില്ലയില്‍ മൂന്ന്‌വര്‍ഷം മുമ്പ് ഒരുലക്ഷം ഹെക്ടറായിരുന്നെങ്കിലും ഇപ്പോള്‍ 75,000 ഹെക്ടറായി കുറഞ്ഞു. കൃഷിവകുപ്പിന്റെ കണക്കുപ്രകാരം 2013- 14 വര്‍ഷത്തില്‍ 92,350 ഹെക്ടര്‍ സ്ഥലത്താണ് കൃഷി നടന്നതെങ്കില്‍, 2014-15ല്‍ ഇത് 85,573 ഹെക്ടര്‍ ആയി കുറഞ്ഞു. 

നെല്‍കൃഷി കുറവുള്ള ഇടുക്കി ജില്ലയില്‍ അഞ്ച്‌വര്‍ഷത്തിനിടെ 729 ഹെക്ടര്‍ നെല്‍കൃഷിയാണ് ഇല്ലാതായത്. ലോറേഞ്ചില്‍ ഇളംദേശം, തൊടുപുഴ ബ്ലോക്കുകളിലാണ് കൂടുതലും നെല്‍കൃഷി ഉണ്ടായിരുന്നതെങ്കിലും പത്തുവര്‍ഷം മുന്‍പുണ്ടായിരുന്നതിന്റെ പകുതി പാടങ്ങളിലും നെല്‍കൃഷി ഇല്ല എന്നതാണ് യാഥാര്‍ഥ്യം. ജില്ലയില്‍ വന്‍തോതില്‍ നെല്ല് ഉല്‍പാദിപ്പിച്ചിരുന്ന രാജാക്കാട്, സേനാപതി, അടിമാലി എന്നിവിടങ്ങളിലും നെല്‍ക്കൃഷി കുറഞ്ഞിട്ടുണ്ട്. ഈ രീതിയില്‍ മുന്നോട്ടുപോയാല്‍ നെല്‍കൃഷിയില്ലാതാകുന്ന ആദ്യ ജില്ലയാകും ഇടുക്കി. 

പത്തനംതിട്ട ജില്ലയുടെ നെല്ലറയെന്ന് വിശേപ്പിക്കുന്ന അപ്പര്‍ കുട്ടനാടന്‍ പാടശേഖരങ്ങളിലെ നെല്‍ക്കൃഷി ഇന്ന് ഏറെ പ്രതിസന്ധിയിലാണ്. കുറച്ചെങ്കിലും ആശ്വാസത്തിന് വകയുള്ളത് ആലപ്പുഴ ജില്ലയിലാണ്. ഇവിടെ കൃഷിയുടെ വിസ്തൃതിയും നെല്ലുല്‍പാദനവും വര്‍ദ്ധിച്ചു. 2017- 18, 2018- 19 വര്‍ഷങ്ങളിലെ കണക്ക് പ്രകാരം സംസ്ഥാനത്ത് നെല്‍കൃഷിയില്‍ വര്‍ധനവ് ഉണ്ടായി. 2017- 18ല്‍ 1,89,086 ആയിരുന്ന നെല്‍ക്കൃഷി 2019ല്‍ 2,08,160 ആയി ഉയര്‍ന്നിട്ടുണ്ട്. എന്നാല്‍ 2013ലെ കൃഷിഭൂമിയുടെ അളവില്‍ പോലും എത്തിയിട്ടില്ല.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.