ലണ്ടന്: ഇംഗ്ലീഷ് ഫുട്ബോളില് അതുല്യനേട്ടവുമായി മാഞ്ചസ്റ്റര് സിറ്റി. ഇംഗ്ലണ്ടിലെ മൂന്ന് കിരീടങ്ങളും സ്വന്തമാക്കുന്ന ആദ്യ പുരുഷ സംഘമെന്ന ഖ്യാതി മാഞ്ചസ്റ്ററിലെ ഈ കരുത്തന്മാര്ക്ക് സ്വന്തം. കഴിഞ്ഞ ദിവസം എഫ്എ കപ്പ് ഫൈനലില് വാറ്റ്ഫോഡിനെ എതിരില്ലാത്ത ആറു ഗോളിന് തുരത്തിയാണ് സിറ്റി ട്രിപ്പിള് തികച്ചത്.
നേരത്തെ ലീഗ് കപ്പ്, പ്രീമിയര് ലീഗ് കിരീടങ്ങളും സിറ്റി നേടിയിരുന്നു. ചാമ്പ്യന്സ് ലീഗില് മുന്നേറ്റത്തിനാകാതിരുന്ന സിറ്റിക്കും പരിശീലകന് പെപ് ഗാര്ഡിയോളയ്ക്കും ഏറെ കരുത്തേകും ഈ നേട്ടം. ആഴ്സണലിന്റെ വനിതാ ടീമാണ് ഈ മൂന്ന് കിരീടങ്ങളും നേടിയ ആദ്യ സംഘം. 2007ലായിരുന്നു അവരുടെ നേട്ടം.
പെപ് ഗാര്ഡിയോളയുടെ തന്ത്രങ്ങളുടെ കൂടി വിജയമാണ് ഇംഗ്ലണ്ടിലെ ഈ അപ്രമാദിത്യം. 1903നു ശേഷം എഫ്എ കപ്പ് ഫൈനലിലെ ഏറ്റവും വലിയ വിജയമാണിത്. അന്ന് ബറി, ഡെര്ബിയെ ഇതേ സ്കോറിന് തകര്ത്തിരുന്നു. ഗബ്രിയേല് ജീസസ്, റഹിം സ്റ്റെര്ലിങ് എന്നിവരുടെ ഇരട്ട ഗോളുകളും ഡേവിഡ് സില്വ, കെവിന് ഡി ബ്യുയ്ന് എന്നിവരുടെ ഗോളുകളുമാണ് സിറ്റിക്ക് തകര്പ്പന് ജയം സമ്മാനിച്ചത്.
പ്രതികരിക്കാൻ ഇവിടെ എഴുതുക: