'ധോണി ഭാരതത്തിന്റെ പ്രതീകം; ബലിദാന്‍ ചിഹ്നം സൈന്യത്തിന്റെയും രാജ്യത്തിന്റെയും അഭിമാനം'; നിലപാട് വ്യക്തമാക്കി കേന്ദ്ര കായിക മന്ത്രി കിരണ്‍ റിജ്ജു

Friday 7 June 2019 6:58 pm IST

ന്യൂദല്‍ഹി : ലോകകപ്പിലെ അടുത്ത കളി മുതല്‍ വിക്കറ്റ് കീപ്പിങ് ഗ്ലൗവിലെ സൈനിക ചിഹ്നം നീക്കണമെന്ന് ആവശ്യപ്പെട്ട് രാജ്യാന്തര ക്രിക്കറ്റ് കൗണ്‍സില്‍ (ഐസിസി) രംഗത്തെത്തിയ സംഭവത്തില്‍ ഇന്ത്യന്‍ താരം മഹേന്ദ്രസിങ് ധോണിക്ക് പിന്തുണയുമായി കേന്ദ്ര കായിക മന്ത്രി കിരണ്‍ റിജ്ജു. സൈനിക ചിഹ്നം നീക്കാനുള്ള ഐസിസി ഇടപെടലിന്റെ പശ്ചാത്തലത്തിലാണ് ധോണിക്ക് പിന്തുണയുമായി കേന്ദ്ര സര്‍ക്കാര്‍ രംഗത്ത് എത്തിയത്. ഇക്കാര്യത്തില്‍ ബിസിസിഐ ധോണിയുടെ ഭാഗത്തു നില്‍ക്കണമെന്നും നിര്‍ദ്ദേശം പിന്‍വലിക്കാന്‍ ഐസിസിയെ പ്രേരിപ്പിക്കണമെന്നും റിജ്ജു ആവശ്യപ്പെട്ടു.

ധോണി തന്റെ വിക്കറ്റ് കീപ്പിങ് ഗ്ലൗവില്‍ സൈനിക ചിഹ്നം ധരിച്ചതില്‍ എന്തു രാഷ്ട്രീയമാണുള്ളതെന്ന് കിരണ്‍ റിജ്ജു ചോദിച്ചു. ക്രിക്കറ്റില്‍ എം.എസ്. ധോണിയുടെ വ്യക്തിത്വമെന്നത് രാജ്യത്തിന്റെ വ്യക്തിത്വമാണ്, സൈന്യത്തിന്റെയും വ്യക്തിത്വമാണ്. അതില്‍ രാഷ്ട്രീയമല്ല. അതുകൊണ്ടുതന്നെ ബിസിസിഐ ഇക്കാര്യത്തില്‍ ധോണിക്കൊപ്പമാണ് നില്‍ക്കേണ്ടത്. ഐസിസിയുമായി സംസാരിച്ച് പ്രശ്‌നം പരിഹരിക്കുമെന്നാണ് പ്രതീക്ഷിക്കുന്നതെന്നും റിജ്ജു പറഞ്ഞു.

അതേസമയം, സ്വയംഭരണാവകാശമുള്ള സ്വതന്ത്ര കായിക സംഘടനകളുടെ കാര്യത്തില്‍ കേന്ദ്ര സര്‍ക്കാര്‍ ഇടപെടുന്നില്ലെന്നും റിജ്ജു വ്യക്തമാക്കി. 'കായിക സംഘടനകളുടെ ആഭ്യന്തര കാര്യത്തില്‍ തല്‍ക്കാലം കേന്ദ്ര സര്‍ക്കാര്‍ ഇടപെടുന്നില്ല. ബിസിസിഐ ഉള്‍പ്പെടെയുള്ള കായിക സംഘടനകള്‍ സ്വതന്ത്രമായി പ്രവര്‍ത്തിക്കുന്നവയാണ്. അവര്‍ കാര്യങ്ങള്‍ ചെയ്യുന്നതും സ്വന്തമായിട്ടാണെന്നും റിജ്ജു ചൂണ്ടിക്കാട്ടി.

ധോണിയുമായി ബന്ധപ്പെട്ട് ഉടലെടുത്തിട്ടുള്ള വിഷയം രാജ്യത്തിന്റെ അഭിമാനപ്രശ്‌നമാണ്. ഇന്ത്യക്കാരുടെ വികാരങ്ങളെ ബഹുമാനിച്ചു വേണം ബിസിസിഐ ഇക്കാര്യത്തില്‍ ഇടപെടല്‍ നടത്താനും ഐസിസിയെ സമീപിക്കാനും. കൃത്യമായ നിലപാട് അവര്‍ ഐസിസിയെ ബോധ്യപ്പെടുത്തണമെന്നും റിജ്ജു നിര്‍ദ്ദേശിച്ചു. ആവശ്യമെങ്കില്‍ കേന്ദ്രസര്‍ക്കാരിന്റെ സഹായം ബിസിസിഐയ്ക്കു തേടാവുന്നതാണെന്നും റിജ്ജു വ്യക്തമാക്കി. 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.