കോട്ടയം: കുട്ടികളുടെ ക്ഷേമം, വികസനം, സംരക്ഷണം എന്നീ രംഗങ്ങളില് മികച്ച സേവനം കാഴ്ചവയ്ക്കുന്ന വ്യക്തികള്ക്കും സ്ഥാപനങ്ങള്ക്കും കേന്ദ്രസര്ക്കാര് ഏര്പ്പെടുത്തിയിട്ടുള്ള അവാര്ഡുകള്ക്ക് അപേക്ഷ ക്ഷണിച്ചു. 10 വര്ഷമായി കുട്ടികളുടെ സമഗ്ര ഉന്നമനത്തിനായി സേവനം നടത്തുന്ന മൂന്നു പേര്ക്ക് നല്കുന്ന രാജീവ് ഗാന്ധി മാനവ് സേവാ അവാര്ഡ് ഒരു ലക്ഷം രൂപയും പ്രശസ്തിപത്രവും ഉള്പ്പെടുന്നതാണ്.
ഇതേ രംഗത്ത് പ്രവര്ത്തിക്കുന്ന വ്യക്തികള്ക്കും സ്ഥാപനങ്ങള്ക്കുമായി ഏര്പ്പെടുത്തിയിരിക്കുന്നതാണ് നാഷണല് അവാര്ഡ് ഫോര് ചൈല്ഡ് വെല്ഫെയര്. സ്ഥാപനങ്ങള്ക്ക് മൂന്ന് ലക്ഷം രൂപയും പ്രശസ്തിപത്രവും വ്യക്തികള്ക്ക് ഒരുലക്ഷം രൂപയും പ്രശസ്തിപത്രവും നല്കും.
സ്ഥാപനങ്ങളില് പ്രതിഫലംപറ്റി ജോലി ചെയ്യുന്നവര് അപേക്ഷിക്കാന് യോഗ്യരല്ല. മുന് പ്രധാനമന്ത്രി രാജീവ് ഗാന്ധിയുടെ ജന്മദിനമായ ഓഗസ്റ്റ് 20ന് രാജീവ് ഗാന്ധി മാനവ് സേവാ അവാര്ഡ് പ്രഖ്യാപിക്കും. ഈ അവാര്ഡിനുള്ള അപേക്ഷ ഫെബ്രുവരി 18ന് മുന്പും നാഷണല് അവാര്ഡ് ഫോര് ചൈല്ഡ് വെല്ഫെയറിനുള്ള അപേക്ഷ ഫെബ്രുവരി 25ന് മുന്പും ജില്ലാ സാമൂഹ്യനീതി ഓഫീസര്ക്ക് സമര്പ്പിക്കണം. കൂടുതല് വിവരങ്ങള്ക്കും അപേക്ഷാഫോറത്തിനും ജില്ലാ സാമൂഹ്യനീതി ഓഫീസുമായി ബന്ധപ്പെടണം. വിശദാംശങ്ങള് ംംം.ംെറ.സലൃമഹമ.ഴീ്.ശി എന്ന വെബ്സൈറ്റിലും ലഭ്യമാണ്.
പ്രതികരിക്കാൻ ഇവിടെ എഴുതുക: